ڕۆشنبیری هەلپەرست: قەیرانی بەهاکان لە سایەی بەرژەوەندییە کەسییەکاندا!
ن: زەکەرییا نەمر
و: هاوژین عومەر
بە شێوەیەکی بنەڕەتی؛ لە هەموو کۆمەڵگەکاندا دەستەبژێری ڕۆشنبیر بەشدارن لە پێکهێنانی هۆشیاریی بەکۆمەڵ و ئاڕاستەکردنی بیر و هزر بەرەو پەرەسەندن. هەرکاتێکیش کەسی ڕۆشنبیر بوویە کەسێکی هەلپەرست، ئەوا ئەو ڕۆڵەی کە دەیبینێت، دەبێتە چەکێکی دووسەر، لە بری هەوڵدان بۆ بەهێزکردنی بەها و پرەنسیپەکان، بیر و هزری خۆی دەخاتە خزمەت بەدەستهێنانی بەرژەوەندییە کەسییەکانیەوە.
ڕۆشنبیری هەلپەرست کەسێکە مەعریفە و زانین و ڕۆشنبیرییەکەی دەخاتە خزمەت بەدەستهێنانی بەرژەوەندییە کەسییەکانیەوە، لەسەر حیسابی ئەو بنەما و پرەنسیپانەی گوایا ئیمان و باوەڕی پێیان هەیە، جا ئەو بەرژەوەندییە کەسییانە ماددیی، یان کۆمەڵایەتی، یان سیاسیی بن. ئەو جۆرەی ڕۆشنبیران بەوە ناسراون کە بە پێی دۆخ و بەرژەوەندییەکان خۆیان دەگۆڕن و گۆڕانکاریی خێرا لە هەڵوێستەکانیاندا دەکەن، تا ئەوەی دەبنە پیاهەڵدەری دەسەڵات، یان خۆگونجاندنیان لەگەڵ ڕەوتی گشتیی، دەکەنە ئامرازی گەیشتن بە ئامانجەکانیان.
هۆکار و پاڵنەرەکانی سەرهەڵدان
چەند هۆکارێک هەن کە وا دەکەن جۆرێک لە ڕۆشنبیر سەرهەڵ بدەن، کە ئامانجیان تەنها دەستخستنی بەرژەوەندییە کەسی و تایبەتییەکانی خۆیان بێت، بەشێک لەو هۆکارانەش:
یەکەم: لاوازیی بەها ئەخلاقییەکان: پابەندنەبوون بە بنەما و پرەنسیپە مرۆییەکانەوە، کەسی ڕۆشنبیر هەڵدەنێت بۆ ئەوەی بەرژەوەندیی خۆی بخاتە پێش هەموو شتێکی دیکەوە.
دووەم: ڕژێمە سەرکوتکارەکان: لە ژێر سایەی ئەو ڕژێمانەی ئازادییەکان سەرکوت دەکەن، بەشێک لە ڕۆشنبیران هەلپەرستیی وەکو پەناگەیەک بۆ پاراستنی پێگە و ژیانی خۆیان دەبینن.
سێیەم: چاوبڕینە پێگەی کۆمەڵایەتی: هەوڵدان بۆ بەدەستهێنانی ناوبانگ، یان دەسەڵات، کەسانێک لەخشتە دەبەن، تاوەکو دەست لە بۆچوون و ڕایەکانیان هەڵگرن.
چوارەم: فشاری کۆمەڵایەتی: خۆبینینەوە لە کۆمەڵگەیەکدا کە تیایدا دەستکەوتە خێراکان بە پیرۆز و موقەددەس سەیر دەکرێن، ڕۆشنبیر بۆ دەستوپەنجەنەرمکردن لەگەڵ ئەو جۆرە لە ژیان، پەلکێش دەکات.
خەسڵەتەکانی ڕۆشنبیری هەلپەرست
خۆگۆڕینی هزریی: ڕۆشنبیری هەلپەرست دەتوانێت زۆر بە ئاسانی گۆڕانکاریی بە سەر ڕا و بۆچوونەکانیدا بهێنێت، بۆ ئەوەی لەگەڵ دۆخە باوەکەدا خۆی بگونجێنێت.
توانای پاساوهێنانەوە: ڕۆشنبیری هەلپەرست بەردەوام پاساو و بەڵگەی ئامادەی پێیە بە ئامانجی لێکدانەوە و بەهانەهێنانەوە بۆ هەڵوێستە دژبەیەکەکانی.
خۆنزیککردنەوە لە دەسەڵات: ڕۆشنبیری هەلپەرست هەمیشە لە هەوڵی ئەوەدایە خۆی لە ناوەندەکانی هێز نزیک بکاتەوە.
لاوازیی ڕەخنەلەخۆگرتن: ڕۆشنبیری هەلپەرست هەروەها توانای بەخۆداچوونەوە، یان داننان بە هەڵەکانی خۆشیدا نییە.
شوێنەواری هەلپەرستیی هزریی لەسەر کۆمەڵگە
یەکەم: لەبەریەکهەڵوەشاندنی متمانەی گشتی: لێرەدا ڕۆشنبیر لە سەرکردە و پێشەوایەکی (ڕا)وە دەبێتە هێمایەک بۆ فێڵ و چاوبەستەکیی.
دووەم: شێواندنی بەها کەلتوورییەکان: بێگومان ڕۆشنبیریی واتای خۆی لەدەست دەدات کاتێک دەبێتە ئامرازێک بۆ بەدەستهێنانی بەرژەوەندییەکان.
سێیەم: پەکخستنی گۆڕانکاریی ئەرێنیی: بە هۆی پشتیوانییکردنی لەو دۆخە باوەی هەیە، ڕۆشنبیری هەلپەرست هەمیشە بەشدارە لە خاوکردنەوەی ڕەوڕەوەی پێشکەوتن و بەرەوپێشچوون.
چۆن مامەڵەیان لەگەڵ بکەین؟
یەکەم: بەهێزکردنی ڕەخنەی کۆمەڵگەیی: لە ڕێگەی هەڵماڵینی دژوارییەکان و ئاشکراکردن و خستنەڕووی نیاز و مەبەستە ڕاستەقینەکانی ڕۆشنبیری هەلپەرست.
دووەم: بەرزڕاگرتنی بەها ئەخلاقییەکان: جەختکردن لە بڵاوکردنەوە و پەخشکردنی کەلتووری نەزاهەت و پرەنسیپەکان لە ناوەندە ڕۆشنبیرییەکاندا.
سێیەم: پشتیوانییکردنی ڕۆشنبیرە ڕاستگۆکان: تیشکخستنەسەر نموونە جوان و ئەرێنییەکان، بۆ ئەوەی کۆمەڵگە شوێنپێیان هەڵگرن.
دواجار ڕۆشنبیری ڕاستەقینە ئەو کەسەیە کە بەرژەوەندیی گشتی دەخاتە سەروو هەموو مەبەست و ئامانجە کەسییەکانەوە، باوەڕیشی وایە کە پەیامە ڕاستەقینەکەی ئەو بریتییە لە بەرگرییکردن لە ڕاستییەکان و خزمەتکردنی مرۆڤایەتی. بەڵام بە پێچەوانەوە؛ ڕۆشنبیری هەلپەرست بۆخۆی ڕەنگدانەوەی قەیرانێکی کۆمەڵایەتی و بەهاییە، کە پێویستی بە چارەسەرکردنێکی ڕیشەییانە هەیە، ئەو چارەسەرییەش سەرەتا دەبێت بە بەهێزکردنی هۆشیاریی دەستەجەمعیی دەست پێ بکات، سەبارەت بە گرنگیی پابەندبوون بە پرەنسیپەکانەوە.
