فیقهی ئیسلامی، گەشەسەندن و ڕەوتی مێژوویی دەرفەتەکانی تازەگەریی

فیقهی ئیسلامی وەكو يەكێك له زانسته شەرعییه پڕ بایەخەکان، له زۆرینەی سەردەم و ساتەکانی مێژووی مسوڵمانان و قۆناغەکانی فەرمانڕەواییان و ژیانی تایبەتی هەر تاکێکی مسوڵماندا، ڕۆڵی گەوره و ئیجتیهادیی بینیوه، چەندین ڕۆڵ و قۆناغی بەپێی سروشت و پێویستییەکانی کات و شوێنەکان بڕیوه و تیایاندا سەرکەوتووانه به سەر گرێ و گوڵ و کێشەکانی روژگاردا زاڵ بووه. لە هەردوو رووی فۆرم و نێوەڕۆکەوه، توانای نوێوونەوه و سەرله نوێ ڕێکخستنەوەی ژیانی کەس و کۆمەڵگەکانی بە شێوازێکی سەردەمی و هاوچەرخانه هەبووه، میللەتانی مسوڵمانی له گێژاوی نەفامی و دواکەوتوویی دەرباز کردووه.