زۆرێك لە ئێمە كاتێك گوێبيستى قسە و باسێك، ياخود ڕووداو و بابەتگەلێكى بێبەنما دەبين، كە جێگەى بڕوامان نييە و، ژيريمان وەريناگرێت، دەڵێين: خورافەيە. بێئاگا لە واتاى بنەڕەتى وشەكە و، حوكمى بەكارهێنانى.
بۆ ئەو مەبەستە بەندە بە پێويستمزانى لەم دەلاقەيەوە تيشك بخەمەسەر واتا و مەبەستەكانى ئەو چەمكە و، ئەوەندەى پێويستبێت لەسەرى بدوێم.
واتاى زمانەوانى و زاراوەيى (خورافە):
(خورافە) وشەيەكى عەرەبييە و، تاكە (مفرد)، (خورافات) كۆكەيەتى (جەمع). لە كردارى (خرف) وەرگيراوە. لە ڕووى زمانەوانييەوە چەند واتايەكى هەيە، يەك لەوانە: قسەى ناڕاست و ترش و خوێكراوە، هەروەك ژمارەيەك لە زمانەوانان وايان واتاكردووە. لەوانە: (فەيروزئابادى)، كە دەڵێت: (هي حديثٌ مُسْتَمْلَحٌ كَذِبٌ). (ئيبن مەنزور)يش دەڵێ: (والخرافة: الحديث المستملح من الكذب). بەڵام گەر لە چاوگ و بنەڕەتى هاتنى وشەكە وردبينەوە، بۆمان ڕووندەبێتەوە لە بنەڕەتدا وشەكە بۆ قسەى درۆ و ناڕاست بەكارنەهێنراوە، بەڵكو واتا زمانەوانەوانييەكەيشى لە هەمان واتا زاراوەييەکەوە وەرگيراوە، كە بۆ مەبەستێكى ديكە بەكارهێنراوە. ئەويش ئەو قسە نائاساييانەبووە كە پياوێك بەناوى (خورافە) كردوونى و، ئاوەزى خەڵكەكە قەبوڵى نەكردووە. وەك هەريەك لە: (ئيبن ئەسير) و، (موناوى) و، (جەوهەرى) و، (رازى) و، (فەيروزئابادى) و، (صاغانى) و، گەلێك لە زانايانى ديكە گوتويانە: (خرافة: اسم رجل من عذرة استهوته الجن، فكان يحدث بما رأى، فكذبوه وقالوا: حديث خرافة). واتە: (خورافە) ناوى پياوێك بووە لە (بەنو عەزرە)، جنۆكە برديان بۆلاى خۆيان، ماوەيەك لەنێوياندا مايەوە، لەو ماوەيەدا شتى سەير و سەمەرەى لێ بينيون، كاتێك گەڕاوەتەوە بۆ ناو خەڵكەكە و، ئەو شتانەى لێى بينيوون بۆيانى گێڕاوەتەوە، خەڵكى بەلايانەوە سەيربووە و بڕوايان پێنەكردووە، سەرەنجام وشەكە وەها بڵاوبۆتەوە هەر قسەيەك ععەقڵگیر و جێگەى بڕوا نەبووبێت، پێيانگوتووە: دەڵێى قسەكانى خورافەيە.
(خورافە) لە فەرمودەكانى پێغەمبەردا (دروودى خوداى لەسەربێت):
لێرەدا ئەو فەرمودانە دەخەينە بەردەست، كە ناو و باسى (خورافە)ى تێدا هاتووە:
1ـ «عن عائشة، قالت: حدث رسول الله صلى الله عليه وسلم نساءه ذات ليلة حديثاً فقالت امرأة منهن: يا رسول الله كان الحديث حديث خرافة، فقال: أتدرون ما خرافة؟ إن خرافة كان رجلاً من عذرة أسرته الجنُّ فى الجاهلية فمكث فيهن دهراً طويلا، ثم ردّوه إلى الانس، فكان يحدث الناس بما رأى فيهم من الاعاجيب، فقال الناس: حديث خرافة».
2ـ «قال رسول الله صلى الله عليه وسلم: رحم الله خرافة إنه كان رجلاً صالحا».
3ـ «عن عائشة أنها قالت: قلت للنبىّ صلى الله عليه وسلم: حدثنى بحديث خرافة، فقال: رحم الله خرافة إنه كان رجلا صالحاً، و إنه أخبرنى أنه خرج ليلة لبعض حاجته فلقيه ثلاثة من الجن، فأسروه فقال واحد: نستعبده، و قال آخر: نقتله، و قال آخر نعتقه، فمرّ بهم رجل منهم فذكر قصة طويلة».
4ـ «عن عائشة، ان رسول الله صلى الله عليه وسلم حدثها بحديث و هو معها فى لحاف، فقالت: بأبى و أمى يا رسول الله، لولا حدثتنى بهذا الحديث لظننت أنه حديث خرافة، فقال رسول الله صلى الله عليه وسلم: و ما حديث خرافة يا عائشة؟ قالت: الشئ اذا لم يكن قيل حديث خرافة، فقال رسول الله صلى الله عليه وسلم إن أصدق الحديث حديث خرافة، كان خرافة رجل من بنى عذرة سبته الجن، و كان معهم فلما استرقوا السمع أخبروه، فخبر به الناس، فيجدونه كما قال».
5ـ «عن عامر قال: بينما رسول الله صلى الله عليه وسلم يحدّث نساءه ذات ليلة فقالت إمرأة منهن: يا رسول الله، لحديث حدثه، كان هذا حديث خرافة، فقال لها رسول الله صلى الله عليه وسلم: أتدرين ما خرافة؟ كان رجلاً من بنى عذرة أسرته الجن فى الجاهلية فمكث فيهم حيناً ثم ردّوه الى الإنس و كان يحدث بما رأى فيهم، فقال الناس: حديث خرافة، حديث خرافة».
لە كۆى ئەم فەرمودانەوە، بۆمان دەردەكەوێت: كە (خورافە) ناوى هاوەڵێكى پێغەمبەر (دروودى خوداى لەسەربێت)، ياخود پياوچاكێكى پێش ئەو بووە و، كەسايەتييەكى ديار و گەورەبووە و، پێغەمبەرى خودا (دروودى خوداى لەسەربێت) ستايشى كردووە و شايەتى ڕاستگۆيى بۆ داوە.
حوكمى بەكارهێنانى وشەى (خورافە) بۆ شتانى ناڕاست و بێبنەما:
لەوەى ڕابوورد، بۆمان دەردەكەوێت، كە ڕەوا و پەسەند نييە بە قسەى پڕو پوچ و ڕووداوى هەڵبەستراو بگوترێت: (خورافات)؛ چونكە وەكو گوتمان، (خورافە) وەك لە فەرمودەكانى پێغەمبەردا (دروودى خوداى لەسەربێت) هاتووە، پياوێكبووە جنۆكە بردوويانە و ماوەيەك لەلاى خۆيان ديليان كردووە و، پاش ماوەيەك ئازاديان كردووە، لەو ماوەيەدا كە ديلبووە شتى زۆر سەيرو سەمەرەى لێ ديون، پاش ئازادبوونى شتە سەيرەكانى بۆ خەڵك گێڕاوەتەوە، بەڵام خەڵك بڕوايان پێنەكردووە، پاش ئەوە هەر قسەيەك سەير و سەمەرە و دوور لە ڕاستى هەبووە، ناويان ناوە قسەكانى (خورافە)، ياخود (خورافات).
كەواتە نابێت بڕواداران بەبێ ئاگايى و بە ناڕەوا توانج و تەشەر لەو كەسايەتييە گەورەيەبدەن و، وەكو خەڵكانى ئەو ڕۆژگارە، ناو و كەسايەتى پياوچاكێكى وەك (خورافە) بكەن بە هێما بۆ قسەگەلێكى درۆ و دەلەسە و ناڕاست.
بە تايبەت كە ريوايەتكراوە پێغەمبەر (دروودى خوداى لەسەربێت) فەرمويەتى: «إن أصدق الحديث حديث خرافة». واتە: ڕاستترين گوتە، گوتەى خورافەيە.
